Tuesday, June 19, 2012

സ്വപ്നങ്ങളില്‍ ചിലത്



മരണമെന്ന ശവക്കച്ച കെട്ടിയവന്റെ-
മങ്ങിയ കാഴ്ച്ചകളല്ല,
തപസിരിക്കുന്നവന്റെ ഉണര്‍ത്തുപാട്ടുമല്ല,
സ്വപ്നം ജീവിക്കുന്നവന്റെ അവകാശമാണ്.

സ്വപ്നത്തിന്റെ നീറ്റലുകള്‍ക്ക്
ആശ്വാസത്തിന്റെ ഗരിമയുണ്ടാവില്ല
മൌനത്തിന്റെ തടവറയാണത്,
പ്രവാസവ്യഥയുടെ സൂര്യതാപവുമാണ്.

ചില സ്വപ്നങ്ങള്‍ എനിക്കുള്ളില്‍ ചിരി പടര്‍ത്തും
ചിലത് ദുരന്തബോധമായി ഒടുങ്ങും
എട്ടുകാലി, ആന, പാമ്പ്, ഭൂകമ്പം, പേമാരി, പടയോട്ടം,
പൂക്കള്‍ പൂമ്പാറ്റകള്‍ രാത്രികള്‍ ആകാശങ്ങള്‍ ...!
സ്വപ്നങ്ങളില്‍ പ്രഫുല്ല നക്ഷത്രങ്ങളുണ്ട്
ആത്മാവിന്റെ സ്വകാര്യ സംഗീതമുണ്ട്
പിരിയുന്ന മനസുകളുടെ പ്രാര്‍ഥനയുണ്ട്
വിഷാദസഞ്ചാരിക്കഭയമേകുന്ന സത്രമാണ് സ്വപ്നം.

സ്വപ്നം സത്യത്തിന്റെ സാര്‍ഥകതയാണ്
സൗന്ദര്യവും സ്നിഗ്ധതയുമാണ്
എനിക്കെന്റെ സ്വപ്നങ്ങള്‍ ജീവനും ആദിവചനവുമാണ്
സ്നേഹവും സ്മൃതിയുടെ തീര്‍ഥാടനവുമാണവ.
_______________________________________________
അഭിപ്രായങ്ങള്‍ / Comments


 

Copyright © 2011 കയ്പും മധുരവും. All Rights reserved
RSS Feed. This blog for Blogger. Faary ഫാരി Sulthana