Sunday, July 31, 2011

ചിരി മാഹാത്മ്യം




ഹോട്ടലില്‍ ബിരിയാണി ചിരിക്കുന്നത് 
പച്ച നോട്ടിന്റെ തിളപ്പ് കണ്ടിട്ടല്ല
പട്ടിണി കിടക്കുന്നവന്റെ ഒട്ടിയ വയറ് കണ്ടിട്ടാണ് !
അത് ചിരിയാണെന്ന് കരുതിയെങ്കില്‍ തെറ്റി.
നെറികെട്ട, കൊഴുപ്പുള്ളൊരു പരിഹാസമാണത്

ബേക്കറിയിലെ കണ്ണാടിക്കൂട്ടിനകത്തുനിന്നും പ്രസരിക്കുന്ന-
പൊട്ടിച്ചിരി,
പഞ്ഞം കിടക്കുന്നവന്റെ കുഴിഞ്ഞ കണ്ണുകള്‍ കണ്ടിട്ടാണ് !
മഞ്ഞയും ചുവപ്പും കലര്‍ന്ന വെറും ഇളിച്ചുകാട്ടലുകളാണത്

കല്യാണപ്പെണ്ണിന്റെ കഴുത്ത് ചിരിക്കുന്നത് 
ചെറുക്കന്റെ മൊഞ്ച് കണ്ടിട്ടല്ല.
അച്ഛന്‍ മരിച്ചുണ്ടാക്കി മകള്‍ക്ക് നല്‍കിയ ജീവിതം കണ്ടിട്ടാണ്
അത് ചിരിയല്ല
ആണിന്റെ ചങ്കില്‍ തറയ്ക്കുന്ന കത്തിമുനയാണ് !

മൂക്കുമുട്ടെ തിന്നുകൊഴുത്ത്, നീലനിറം വന്ന നിങ്ങള്‍ -
മഹാന്‍മാര്‍ !
നിങ്ങളുടെ ഹൃദയം മോഹങ്ങള്‍ നല്‍കുമ്പോള്‍
പാവം ഈച്ചകള്‍ ചിരിക്കുന്നത്,
നിന്നിടത്തുനിന്നും നിങ്ങള്‍ വിസര്‍ജ്ജിക്കുന്നത് കണ്ടിട്ടാണ്.
_______________________________________________
// നമുക്ക് ചുറ്റും എത്രയെത്ര പട്ടിണി മരണങ്ങള്‍ //

അഭിപ്രായങ്ങള്‍ 




Sunday, July 24, 2011

എവിടെയെന്‍ ഹൃദയം ?




നാട്ടില്‍ - 
മന്ത്രി:       എവിടെയെന്‍  സിംഹാസനം?
ഭാര്യ :        കൊത്തി ഞാനത് വിറകാക്കി.

കാട്ടില്‍ -
വേട്ടക്കാരന്‍ :   "എവിടെയെന്‍ പുള്ളിമാന്‍ ?"
ഭാര്യ :                 "അതിനെ വിറ്റ് അരി വാങ്ങി"

വീട്ടില്‍ -
ഭര്‍ത്താവ് :  "എവിടെയെന്‍ മൊബൈല്‍ ഫോണ്‍ ?"
ഭാര്യ  :           "മോളതില്‍ കിന്നരിക്കുന്നു..."

റോഡില്‍ -
വഴിപോക്കന്‍ :  "വേണമായിരുന്നു അല്പം വെള്ളം"
കടയുടമ :           "കാശുണ്ടോ കയ്യില്‍ "

ഏട്ടില്‍ -
കവിത :       "എവിടെ മനുഷ്യ ഹൃദയം ?"
പുറംചട്ട :     "ഇവിടെയുണ്ട്  എനിക്കുള്ളില്‍ "


അഭിപ്രായങ്ങള്‍ 
 

Copyright © 2011 കയ്പും മധുരവും. All Rights reserved
RSS Feed. This blog for Blogger. Faary ഫാരി Sulthana